വിശുദ്ധമിഖായേൽ – ദൈവത്തെപ്പോലെ ആരുണ്ട്?ഒൻപതു ദിവസത്തെ അനുദിനപ്രാർഥനകളിലൂടെ നമുക്കു വിശുദ്ധ മിഖായേലിൻറെ സംരക്ഷണം തേടാം.

സ്വർഗീയ സൈന്യങ്ങളുടെ രാജകുമാരനും മുഖ്യദൂതനുമായ വിശുദ്ധ മിഖായേൽ, സാത്താനും ദുഷ്ടശക്‌തികൾക്കുമെതിരെയുള്ള പോരാട്ടത്തിൽ നമ്മുടെ ഉറച്ച സഹായമാണ്. ഈ അവസാനനാളുകളിൽ, കർത്താവിൻറെ രണ്ടാം വരവിനായി ഒരുങ്ങിക്കൊണ്ടിരിക്കുന്ന മാനവകുലത്തെ രക്ഷകനിൽ നിന്നകറ്റാനുള്ള ഘോരയുദ്ധത്തിൽ ഏർപ്പെട്ടിരിക്കുന്ന സാത്താനെതിരെ യുദ്ധം ചെയ്യാൻ പരിശുദ്ധ അമ്മയുടെ കൊടിക്കീഴിൽ അണിനിരക്കുന്ന വിശുദ്ധരുടെ സൈന്യത്തിൻറെ സംരക്ഷകനും വിശുദ്ധ മിഖായേലാണ്. യുഗാന്ത്യസംഭവങ്ങളിൽ മുഖ്യദൂതനായ വിശുദ്ധ മിഖായേലിൻറെ പങ്കു നിർണായകമാണ് എന്ന തിരിച്ചറിവിൽ നിന്നാണു ലിയോ പതിമൂന്നാമൻ പാപ്പാ വിശുദ്ധ മിഖായേലിനോടുള്ള പ്രാർഥന രചിച്ചതും എല്ലാ കത്തോലിക്കാ ദൈവാലയങ്ങളിലും ആ പ്രാർഥന എല്ലാ ദിവസവും ചൊല്ലണം എന്നു നിർദേശിക്കുകയും ചെയ്തത്. നിർഭാഗ്യവശാൽ രണ്ടാം വത്തിക്കാൻ കൗൺസിലിനുശേഷമുള്ള വർഷങ്ങളിൽ ഈ പ്രാർത്ഥനയുടെ പ്രാധാന്യം മനസിലാക്കുന്നതിൽ പലരും പരാജയപ്പെട്ടു. എന്നാൽ ഈ അടുത്ത കാലത്തായി വിശുദ്ധ മിഖായേലിനോടുള്ള ഭക്തിയിൽ വലിയൊരു ഉണർവു കാണുന്നുണ്ട് എന്നതു ശുഭോദർക്കമാണ്.

മുഖ്യദൂതന്മാരായ വിശുദ്ധ മിഖായേൽ, ഗബ്രിയേൽ, റഫായേൽ ദൂതന്മാരുടെ തിരുനാളിന് (സെപ്റ്റംബർ 29) ഒരുക്കമായി ഒൻപതു ദിവസത്തെ അനുദിനപ്രാർഥനകളിലൂടെ നമുക്കു വിശുദ്ധ മിഖായേലിൻറെ സംരക്ഷണം തേടാം.

ഒന്നാം ദിവസം (സെപ്റ്റംബർ 20)

ദൈവത്തെപ്പോലെ ആരുണ്ട്? ദൈവത്തിൻറെ ദൂതന്മാരുടെ നായകനായ വിശുദ്ധ മിഖായേലേ, അഹങ്കാരം കൊണ്ടു ദൈവത്തെ വെല്ലുവിളിച്ച ലൂസിഫറിനെയും അവൻറെ കൂട്ടുകാരെയും അനുഗമിച്ച്, അഹങ്കാരം എന്ന പാപത്താൽ സ്വയം നശിക്കുന്നവരെ ഓർത്തു പ്രാർഥിക്കുന്നു. ദൈവത്തെപ്പോലെ ആരുമില്ല എന്നും ദൈവത്തിൻറെ മുൻപിൽ മനുഷ്യന് അഹങ്കരിക്കാൻ ഒന്നുമില്ല എന്നുമുള്ള ബോധ്യം എല്ലാ മനുഷ്യരിലും ജനിപ്പിക്കണമേ.

പ്രാർഥന:

മുഖ്യദൂതനായ വിശുദ്ധ മിഖായേലേ, ഭീകര പോരാട്ടസമയത്ത് അങ്ങു ഞങ്ങളുടെ തുണയും സഹായവുമായിരിക്കണമേ. പിശാചിൻറെ ദുഷ്ടതയിലും കെണിയിലും നിന്ന് ഞങ്ങളെ കാത്തുരക്ഷിക്കണമേ. ദൈവം അവനെ ശാസിക്കട്ടെ എന്നു ഞങ്ങൾ എളിമയോടെ പ്രാർത്ഥിക്കുന്നു. ആത്മാക്കളെ നശിപ്പിക്കാനായി ലോകമെങ്ങും ചുറ്റിനടക്കുന്ന സാത്താനെയും മറ്റെല്ലാ ദുഷ്ടാരൂപികളെയും അല്ലയോ സ്വർഗീയസൈന്യാധിപാ, അങ്ങു ദൈവത്തിൻറെ ശക്തിയാൽ ബന്ധിച്ചു നരകാഗ്നിയിലേക്കു തള്ളിക്കളയണമേ. ആമേൻ.